داستان تاریخی : کوروش و «پانته آ» به زبان تالشی
کوروش و پانتهئا تاریخیېه داستان فومهنی تالݖشون زݖبون و کادوسه خهتی نه 🌹
مادی سݖپائؽن، ۏهختی شوشی جهنگی کو پیروز بینه ئو ئݖشتهن ۏݖلهت ئاگهردینه، خهېلی چیېون غهنیمهت گێتهشونا.
ئهۏون ئیتؽ ئه چاکه غهنیمهتون کوروشی را پیشکهشی ۏوئهرده. پیشکهشی ههمرا ئیگݖله خوشکیله ژؽنهک نی ئؽستا کݖ ۏاېن: چؽ شیۏار خاسه ژؽنهک، شوشی کو کهسی مهنده نیېا.
ئه ژؽنهکی نوما، پانتهئا. ژؽنهکی شۊ « ئابراداتاس» شوشی پادݖشا فݖرمونی نه پیلله کاری خونه دیېهر ۏݖلهتی را مهموریېهت شا.
کوروشی را ۏهختی ئه ئهسیره ژؽنهکی خوشکیلی ئابازه نه ۏاتݖشونه، کوروشی ۏاته: ئهز ههرگݖز ئه ژێنهکی کݖ شۊ بݖدارݖ چؽ شۊئهر کو نؽجیگؽرݖم. کوروشی نه ۏاتݖشونه: تݖ ههلا بؽری، ئیدهفا ئهې بݖۏین.
کوروشی ۏاته: نؽخام، ئهې بݖۏینݖم. کوروش، تهرسی کݖ ئهگه ژؽنهکی خوشکیلی بݖۏینݖ، بهسکهم چؽ دیلی بݖبهرݖ ئو ئیبلیس ئهې ۏازی بݖده. ههې را نؽخازتݖشه ئه ژؽنهکی چؽم پؽرېهنݖ.
کوروشی ئه ژؽنهکی نؽۏینده بهما ئیگݖله ئݖشتهن باخݖدا ئو چاکه نیگهۏونون کݖ چؽ نوم ئاراسپا، دهخوندݖشه. دورادور ئه ژێنهکی چؽ دهس ئیسپوردݖشه دا خاسخاسؽ نه ئه ژؽنهکی، گهنج و غݖرفݖنه ئهمونهتی شیۏار ۏیرݖها بوبو دا ژؽنهکی شۊ ئاگهردݖ.
باخݖدا ئاراسپی دا ئه ژؽنهکی ۏینده، چؽ خوشکیلی خونه ئݖشتهنݖش ئهۏی ئاکهرده ئو ژؽنهکی دیلباخته به. ئه نیگهۏون، پانتهئا کو چؽم داری. هݖنته ۏەخت پوشه دا چاکه ۏهختی گیر ۏوئهردݖشه ئو ژؽنهکی ۏیترهکه، خازتݖشه، ئهې را دهسدݖرازی بݖکهرݖ.
پانتهئا زاهار و جݖروئه ئامهنده ئو کݖمهک خازتݖشه ئو کوروشی را دهخوندݖشه.
کوروش باغی کو مهندا کݖ پانتهئا زاهارݖش مهسه، ئهلبهلی ئهې را ئارهسه. ئاراسپ کݖ ئاۏرۊداره مؽردهکی ېا، خݖجالهتی رؽز و پؽز ئابه ئو خهېلی کوروش دهس و پا دهلهکه ئو بهخشݖش خازتݖشه.
کوروشی، ئاراسپی نه ۏاته: ئݖشتݖ تهنبؽ ئݖمه کݖ شوش بݖشی، پانتهئا شۊئهر بݖتلهفی ېو مݖرا بوئهری. ئاراسپ شوش شه ئو ژؽنهکی شۊئهر تݖلهفتݖشه ئو ئهې، کوروشی ۏهر ۏوئهردݖشه.
کوروشی، پانتهئا، ئوسوئهمونه چؽ دهس ئیسپورده.
ژؽنهکی شۊ، ئابراداتاس، ۏیېهر خݖشخال ئابه. کوروشی نوجهبایی و باخݖداېی کݖ ۏیندݖشه، ۏاتݖشه: ئهز دؽ چیم به دیم ئݖشتݖ فیداېی ېو نݖکهریمه، ئݖشتݖ سݖپا مینی کو خݖتمهت کهرݖم و تݖرا جهنگ کهرݖم.
چؽ به دۊم، ئیروزی ۏهختی ئابراداتاس خاې، کوروشی سݖپا ههمرا جهنگ بݖشی، پانتهئا، ئݖشتهن شۊئهر دهسی گؽته، هݖنته کݖ چؽ چؽمون کو ئهسݖرک ۏیۏاری، ئهې نه ۏاتݖشه:
ئابراد جان، تݖ به ئه مؽر و ئؽشخی کݖ چهمه مینه نوئه، غهسهم دهم، ئݖسه کݖ کوروشی ئهمه را ههده چی چاکه کار و نوجهباېی کهرده، ئݖسه چهمه نوبه ېه دا ئهمه نی کوروشی خوبی ئهې را تهلافی ئاکهرهم، چهمه بابهفاېی ئهې نݖشون بݖدیېهم.
ژؽنهکی ۏاته: ۏهختی ئهز کوروشی را پیشکهش بیمه، ئه ههر کاری مݖ نه شاې کهردؽ بهما هیچ مݖن دهس نؽئاسوشه دا ئݖشتݖ ۏهری کو شهرمهنده ئو روسیېا مهبوم، هݖنته مݖ نه به کݖ خیېال کهریش، ئهز چؽ بݖرۏهرژؽنیمه.
پهلهۏونه ئابراداتاس جهنگ شه. کوروشی را جهنگی کو دیلهغهرده جهنگهکهرون شیۏار جهنگه ئو شههید به.
ۏهختی چؽ جݖنازهشون ئیرون ۏوئهرده، پانتهئا، ئݖشتهن شۊئهر جݖنازه سهر شه، غهش کهردݖشه. کوروشی، پانتهئا کݖلفهتی نه ۏاته: پانتهئا خوب چؽم بݖدار، خاسی ئهې ۏیرݖها بݖب، نؽکی، ئݖشتهن بهلا به سهر بݖکهرݖ.
پانتهئا هݖنته دا رۊکه تؽلی ئݖشتهن دالانی کو دور ئابه، کارده ئݖشتهن دیلگا سهری ۏیخوشه. کݖلفهتی دا پانتهئا مهردؽ ۏینده، کوروشی مهزهمهت و چؽماېی خونه، ئݖشتن کݖشتݖشه.
ئݖم خهۏهر کݖ کوروشی گوش رهسه، زۊ جݖنازان سهر ئومه، خهېلی بݖرهمݖ کهردݖشه، بهدهز فݖرمون دوشه: ئه ژؽن و شۊ کݖ ېهندی ئاشݖخینا، ئیتݖرومی نه ئیگݖله دهخمه کو بݖنهن.
✍رمضاننیکنهاد💥
در خط تالشی کادوس:
به جای فتحه/a/ ە
به جای کسره/e/ ؽ
به جای واو/v/ ۏ
به جای شوا /ə/ ݖ
به جای یه/y/ ې
هدف ما در این وبلاگ معرفی فرهنگ مردم تالش و آشنایی هممیهنان گرامی با جاذبههای گرشگری شمال کشور به ویژه گیلان و تالش است